Då Ridley Scott på tampen av 2024 slepte «Gladiator II» laus på publikum, var det lett å avskriva filmen som noko nær camp-versjonen av «Gladiatoren» – regissørens sjangerskapande, romerske helteepos frå 2000 (då filmar enno fekk norsk tittel på kino). Men hendingar utanfor kinoen kan fort gje filmar ny meining. Eit par månadar etter premieren vart Trump–Vance-styret formelt innsett på Washingtons Capitol, og brått verka Scotts oppdikta nidportrett av den forfengelege og hemngjerrige keisarduoen Caracalla og Geta, og dei kyniske kleptokratane rundt dei, nifst aktuelt.