Helene Hovden Hareide

Butikksongar

Dikt

Aschehoug 2020, 86 sider

Før eg byrja å lese Helene Hovden Hareides debutbok «Butikksongar», tenkte eg ei stund på kva litteratur eg har lese om daglegvarebutikken, denne staden som er så sentral i samfunnet at ein knapt tenkjer over han før det er smørkrise eller mangel på dopapir. Sant å seie blei ikkje lista over butikklitteratur særleg lang, og to sentrale franske samtidsforfattarar var omtrent så langt eg kom: Michel Houellebecq har skrive sjaskete sonettar og aleksandrinar frå supermarknadens endelause frysediskar, medan Annie Ernaux har skildra både landhandlar og supermarknadar med sosiologiske briller og menneskeleg blikk.