Nei, Magne Kaldhusdal, eg meiner ikkje at den Nato-kritiske venstresida reagerte sterkare på invasjonen i Ukraina i 2022 enn på invasjonane i Ungarn i 1956 og Tsjekkoslovakia i 1968 (Klassekampen 8. juli). Mitt «underliggande» poeng i innlegget «Behagelig avstand fra kjøkkenhagen vår?» 5. juli var at Nato-motstandarane såg på overgrepa på 50- og 60-talet som eit uttrykk for blokkpolitikken, som vi måtte komme vekk frå. Etter samanbrottet for Sovjet-Unionen i 1991 var det eit historisk vindauge for oppløysing av maktblokkene og ei alleuropeisk sikkerheitsordning. I staden fikk vi Natos «out of area»- strategi med talrike militære felttog i Jugoslavia, Asia og Afrika – og ekspensjon austover i det som før var Sovjets buffersone mot vest. Ukraina blei lovt Nato-medlemskap alt i 2008.