Ein skarp strateg med mildt åsyn, skreiv Ottar Grepstad då det vart kjent at Olaf Almenningen døydde utan varsel 11. juni, 78 år gamal. Det var ei konsis oppsummering av Olafs storfelte innsats for målsaka gjennom fleire tiår. Olaf var organisatorisk og språkvitskapleg ein bauta i målrørsla, med Noregs Mållag og Norsk Ordbok som viktigaste verkefelt. Han hadde eit omfattande forfattarskap og var heidersmedlem i både Noregs Mållag og Bondeungdomslaget (BUL), som var eit anna av hjartabarna hans.