Eg er verken uvitande eller arrogant i spørsmålet om honorar for skribentar i tidsskrift, slik eg blir skulda for her i avisa av Marit K. Lykken Flåtter i ArtScene Trondheim. Norsk tidsskriftforening (TF) er sjølvsagt for anstendige honorar som er til å leve av, noko vi også poengterte då Kulturrådet hadde sin første offisielle presentasjon av den nye støtteordninga for kritikk og tidsskrift. Vi er svært glade for arbeidet som er gjort i Kulturrådet med å gripe fatt i den økonomiske situasjonen til desse felta, og vi har vore pådrivarar for dette lenge. No får tidsskriftfeltet eige utval, eigen områdeplan og høgare prioritering i rådet. Vi er dei første som jublar for dette.